هه‌واڵ

حكومەت تێچووی خوێندنی کەسوکاری شەهیدان دەگرێتە ئەستۆ

وتەبێژی وەزارەتی شه‌هیدان و ئه‌نفالكراوانی حكومه‌تی هه‌رێمی كوردستان ڕایگەیاند: وەزارەتی دارایی رەزامەندی دەربڕیووە لەسەر خەرجکردنی پارەی تێچووی کەسوکاری شەهیدان و زیندانیانی سیاسی .

فوئاد عوسمان وته‌بێژی وه‌زاره‌تی شه‌هیدان و ئه‌نفالكراوان راگەیاند: وەزارەتی دارایی ڕەزامەندی دەربڕیووە لەسەر خەرجکردنی ٢٢٣ ملیۆن و ٥٧٠ دیناری عێراقی بۆ ئەو قوتابیانەی کە لە دەرەوەی زانکۆکانی هەرێم خوێندوویانە و ژمارەی قوتابیەكانیش ١٨٩ قوتابیە و ئەو بڕە پارەیە بۆ خوێندنی ساڵی (٢٠١٤ – ٢٠١٥) یە، کە بەهۆی قەیرانی داراییەوە ئەوکات حکومەت نەیتوانیووە پارەکەیان خەرج بکات.
سەبارەت بە پارەی خوێندنی (٢٠١٥-٢٠١٦) وته‌بێژی وه‌زاره‌تی شه‌هیدان و ئه‌نفالكراوان ڕایگەیاند: وەزیری شەهیدان و ئەنفالکراوان لیژنەیەکی پێکهێناوە بۆ بەدواداچوونی کێشەی ئەو قوتابیانە و لیژنەکە لە هەوڵی بەردەوامدایە بۆ بەدەستخستنی پارەی خوێندنی ساڵی ڕابردووش بۆ ئەو قوتابیانەی لەسەر ئەرکی حکومەت خوێندویانە.
حکومەتی هەرێمی کوردستان پێشتر خەرجی کەسوکاری پلەیەکی شەهید و زیندانیانی سیاسی دەکرد کە لە زانکۆ ئەهلییەکاندا دەیانخوێند، لە ساڵی ٢٠١٤ وە بەهۆی درووستبونی قەیرانی دارایی ئەو پڕۆژەیە کێشەی تێکەوتووە و وەزارەتی شەهیدان زانکۆکانیان ئاگادارکردۆتەوە کە ڕاستەخۆ مامەڵە لەگەڵ حکومەت بکەن نەک قوتابیان.

وەڵامێک بنووسە