هه‌واڵ

داوای دەستلەكاركێشانەوەی بەرێوەبەری گشتی پەروەردەی سلێمانی دەكرێت

مامۆستایانی ناڕازی شاری سلێمانی داوای دەستلەكاركێشانەوەی دڵشاد عومەر بەرێوەبەری گشتی پەروەردەی سلێمانی دەكەن، ئەوەش لەبەرانبەر ئەو قسانەی بەرانبەر مامۆستایان كردی.

مامۆستایانی ناڕازی ئەمڕۆ یەك شەممە 13/11/2016 لەبەردەم بەرێوەبەرایەتی پەروەردەی سلێمانی كۆبوونەوەو داوای دەستلەكاركێشانەوەی بەرێوەبەری گشتی پەروەردەی سلێمانیان كرد.

هەروەها مامۆستایانی ناڕازی هۆكاری داواكارییەكەیان بۆ ئەوە گێڕایەوە، كە دڵشاد عومەر بەمامۆستایانی مانگرتووی سلێمانی وتووە، “فەوزاچی‌و گێرەشێوێن”، كە سەرەڕای داواكاری دەستلەكاركێشانەوە، دەبێت “داوای لێبوردنیش بكات”.

رۆژی چوار شەممەی رابردوو دڵشاد عومەر بەرێوەبەری پەروەردەی سلێمانی لەمیانی كۆنگرەیەكی رۆژنامەوانی دەستپێكردنەوەی دەوامی راگەیاندو باسی لەوەش كرد، كۆمەڵێك “مامۆستای فەوزاچی‌و گێرەشێوێنن، مانگرتن ناشكێنن”.

لەدواین لێدوانیش ناوبراو روونكردنەوەی لەسەر قسەكەی داو رەتیكردەوە بەمامۆستایانی مانگرتووی وتبێت “گێرەشێوێن‌و فەوزاچی”، بەڵكو مەبەستی ئەوە بووە، سلێمانی پارێزگاری نییەو بەو هۆیەشەوە “فەوزا لەشارەكە دروست بووە”.

وەڵامێک بنووسە