خوێندن و په‌روه‌رده‌

خوێندنی باڵا دەیەوێت لە پڕۆژەکانی حكومەتدا سود لە توێژینەوەی خوێندكاران وەربگیرێت

ساڵانە لە کۆتا قۆناغی خوێندندا خوێندکاران لە سەرجەم کۆلیژە جیاوازەکاندا توێژینەوە لەسەر بابەتێکی جیاواز ئەنجام دەدەن، لە ماوەی چەند ساڵی رابردووشدا دوای تەواوبوونی توێژینەوەکان لە نێو دۆڵابێکدا دادەنران و تۆزیان لەسەر دەنیشت بەڵام وەزارەتی خوێندنی باڵا بریاریدا لەمەودوا لە پڕۆژەکانی حكومەتدا سود لە توێژینەوەكانی خوێندكارانی زانكۆ وەربگیرێت.

لەو چوارچێوەیەشدا، ئەنجومەنی توێژینەوەی زانستی لە هەرێمی كوردستان كە دوو ساڵە دامەزراوە، لە كۆنفڕانسێكدا بە بەشداری شارەزایانی پەروەردە و توێژەرانی پڕۆژەكان گفتوگۆی لەسەر ٨٠ پڕۆژەی خوێندكارانی زانكۆ كرد لەو ٨٠ پڕۆژەیەش ٢٣ پڕۆژە هەڵبژێردران بۆ ئەوەی كاریان لەسەر بكرێت.

 

سەرۆكی ئەنجومەنی توێژینەوەی زانستی لە هەرێمی كوردستان دەڵێت، توێژینەوەكان لە سەرجەم سێكتەرەكان كراوە لە لایەن حكومەتی هەرێمەوە نزیكەی ٢٥٠ ملیۆن دینار تەرخان كراوە بۆ بە ئەنجام گەیاندنی توێژینەوەكانی خوێندكاران تا بكرێن بە پڕۆژە

ساڵانە لە هەرێمی كوردستان بە سەدان توێژینەوە لە بوارە جیاجیاكان لە لایەن خوێندكارانی زانكۆوە ئەنجام دەدرێت لە سەرجەم بوارەكان.

شارەزایەكی بواری پڕۆژەكانیش دەڵێت سەرجەم پڕۆژەكانی خوێندكاران لە لە ماوەی چەند ساڵی رابردوودا لە دۆلابەكانی زانكۆكاندا دانراون و سودیان لی وەر نەگیراوە، بۆیە ئێستا دەیانەوێت توێژینەوە گرنگەكان بكرێن بە پڕۆژە  بۆ سەرجەم وەزارەت و دەستەكان بنێردرێن بە پێی ئیشی وەزارەتەكان.

لە كۆتایی كۆنفڕانسەكەدا ڕاسپاردەی سەرجەم پڕۆژەكان ئامادە كران و پێشكەش بە حكومەت و سەرجەم وەزارەتەكان دەكرێن لە ماوەیەكی نزیكیشدا دەخرێنە بواری جێبەجێكردنەوە و ئەنجومەنەكە چاودێر دەبێت تا بە ئەنجام گەیاندنی سەرجەم توێژینەوەكان بە پڕۆژە بۆ چارەسەركردنی ئەو كیشانەی لە وەزارەت و دەستەكانی حكومەتدا هەن.

وەڵامێک بنووسە